LAOAG CITY – Immadu ti bilang dagiti pasiente a nakapasar ti leptospirosis a naka-admit ita iti National Kidney and Transplant Institute (NKTI) kalpasan ti Super Typhoon Carina ken angin abagat iti pagilian.
Segun ken ni National Kidney and Transplant Institute Deputy Executive Director for Medical Services Romina Danguilan, dumanon iti pakabuklan nga 67 ti leptospirosis patient a manarimaan a matamtaming iti ospital a kasapulan ti dialysis gapu ta naapektaranen ti kidney ken pancreas. Sumagmamano kadagitoy ket makapaspasar ti nakaro a kondision no sadinno nga addaa ti dua a naka-intubate.
Karaman kadagiti inaramid nga addang ti ospital iti baet ti panagadu dagiti pasiente nga addaan ti leptospirosis a na-admit ket ti panag-convert iti gymnasium-da iti leptospirosis ward.
Nagkiddaw metten ti ospital ti kanayunan pay a 20 a nurse ken 10 a doktor manipud iti Department of Health tapno malitupan ti kinakurangda iti manpower.
Iti datos manipud iti Department of Health idi Hulio 13, adda ti pakabuklan a 1,258 ti kaso ti leptospirosis iti pagilian no sadinno nga addan ti 133 ti pimmusay.
