LAOAG CITY – Inpakaammo ti Bise Mayor ditoy siudad ti Laoag nga ad-adda a mapatibker ti Lesbian, Gay, Bisexual, Transgender, Queer (or Questioning), Intersex, Asexual (LGBTQIA+) Community ditoy siudad ti Laoag babaen ti Induction Program.
Segun iti Bise Mayor, ti nasao a programa ket mangipaay ti gundaway para kadagiti LGBTQIA+ Community nga ipakita dagiti karbengan dagitoy gapu ta dakkel ti maitulongda iti panagdur-as iti ekonomia ken dadduma pay a sektor.
Inrakurakna a ditoy a nabukel iti “BEKS” Brilliance, Excellence, Kindness and Service, a maysa nga adbokasia a mangipakita iti agtultuloy a panagkikinammayet dagitoy.
Kunana nga adu dagiti miembro iti LGBTQIA+ Community a maibabbaba gapu iti kinataoda isu’t gapuna a babaen iti nasao a programa ket maipaadal iti kaaduan a dagiti maseknan ket dakkel ti akemda iti komunidad.
Innayonna a babaen ti nasao a programa ket maisardeng ti diskriminasion kontra kadagiti miembro ti LGBTQIA+ Community ken masapul nga ipakita ken maipasagepsep iti panunot nga amin a tattao ket agpapada aniaman ti estado ti biag.
