LAOAG CITY – Mangkita ti pundo ti lokal a gobierno iti ili ti Badoc nga idadauloan ni Mayor Virgilio Calajate para kadagiti masapul a matarimaan kadagiti nagduduma nga opisina.
Inbatadna a daytoy ket kalpasan nga awan ti pundo a nabati para iti daytoy malaksid iti personal savings.
Nupay kasta, tingitingenda dagiti kasapulan nga ipangpangruna a mapundoan kas ti merkado publiko a rinugianda a tinarimaan ti drainage canal ken ti tiles daytoy.
Inlawlawagna a tapno mapapintas pay ti merkado publiko ket mangilatangda ti pundo gapu ta ti kangrunaan a reklamo ket ti suplay ti danum.
Kunana a daytoy ti rason no apay a nakikoordinarda iti Ilocos Norte Water District tapno adda ti husto a paggapoan ti danum a mapan iti merkado publiko.
Innayonna a no kitaen ket iti ili ti Badoc ti paggapgapoan ti adu a danum nga ipadpadawatda pay iti ili ti Pinili ngem no apay a mismo nga ilida ket agkurkurang pay ti danum.
