LAOAG CITY – Agtultuloy ti panangkitkita ti gobierno lokal iti ili ti Bangui no kasano da a matulungan dagiti transport groups iti nasao nga ili gapu iti agtultuloy a panagngato ti presyo dagiti produkto a petrolyo.
Daytoy ti inpakaammo ni Mayor Denton Garvida iti ili ti Bangui.
Kuna na a nakitaripnong kadagiti driver ti pampubliko a transportasyon iti ili ti Bangui tapno amwen no ania dagiti kalikagom da a maipaay kadakuada a tulong manipod iti gobierno lokal.
Innayon ti mayor a maysa kadagiti napagsasaritaan da ket ti possible a pannakaipangato ti plete gapu iti agtultuloy a panagngato ti presyo dagiti produkto a petrolyo, nga epekto ti mapaspasamak a gubat iti Middle East.
Nupay kasta, saan paylaeng a dinakamat ti mayor no mano ti possible a mainayun ti plete gapu ta kasapulan nga ipinal da nga umuna sakbay a maipublikar.
