LAOAG CITY – Kalikagom ti local a gobierno iti ili ti Bangui nga umado dagiti mannalon nga agmula ti tabako.
Segun kenni Mayor Denton Garvida, nakita da nga ad-ado nga amang ti sumrek iti ili a maisubli met laeng kadagiti mannalon babaen ti panagmula ti tabako.
Kunana a kasapulan laeng a gutiguten dagiti mannalon nga agmula ti ad-ado a tabako ken patienna a babaen ti naiget a suporta ti lokal a gobierno ket kabaaelan da nga aramiden daytoy.
Inpakaammo ni Garvida nga addan ti pannakikoordinar da iti lokal a gobierno iti ili ti Pinili nga isu ti kadakkelan ti maal-ala a porsyento manipod iti RA 7171.
Immuna iti daytoy, kinumpirmaran ni Vice Mayor Maynard Francis Bumanglag iti ili ti Pinili nga indasar ni Mayor Garvida ti kalikagomda idi isuna ket bise mayor paylaeng ken kayatda a maamoan dagiti napintas nga addang tapno umado dagiti mannalon a magutigot nga agmula ti tabako.
Iti agdama, naamoan a malaksid iti pagay ket barley ti kangrunaan nga imulmula dagiti mannalon iti ili ti Bangui.
Maipalagip a ti RA 7171 wennu Virginia Tobacco Act ket maysa a linteg ditoy pagilyan a mangipasigurado a maipaayan ti pinansyal a tulong dagiti mannalom nga agmulmula iti nasao a produkto babaen ti pannakaisubli ti 15% iti lokal a gobierno manipod iti pakabuklan a gatad a makolektar iti gobierno a buwis kadagiti mailako a tabako.
