LAOAG CITY – Inpakaammo ni Municipal Mayor Denton Garvida a saanda a nangiyalokar ti pundo para iti Farm-to-Market Roads (FMR) manipud iti bingayda a pundo ti RA7171 wenno ti special support to farmers in Virginia tobacco-producing provinces.
Kuna ti Mayor a naipaay amin dagiti pondo iti pannakagatang kadagiti farm inputs ken makinarya nga usaren dagiti mannalon tapno mapabassit ti gastosda iti panagtalon.
Kinunada a gagemda a masigurado nga amin a grupo dagiti mannalon ket adda ti usarenda a kompleto a ramit. Kalikagomda met a ti Bangui ti agbalin a maysa kadagiti kangrunaan a mangsuplay iti nateng kadagiti kabangibang nga ili.
Inlawlawagna a saanda a nangiyalokar iti pondo para iti Farm-to-Market Roads gapu ta adda dagiti national agencies a mabalin a mangpondo iti nasao a proyekto.
