LAOAG CITY – Agbalbalinen a Pet-friendly ken Rabies-free ditoy ciudad ti Laoag.
Daytoy ti inpakaammo ni Dr. Samantha Licudine, ti mangidadaulo ti City Veterinary Office ditoy ciudad.
Segun kenni Dr. Licudine, naurnos ken epektibo iti panangkampaniada iti pananglapped ti rabies ditoy ciudad.
Inbatad na a maymaysa pay laeng ti nagpositibo nga aso nga addaan ti rabies ita a tawen no ikompara iti napalabas a tawen nga addaan iti 19.
Kunana a dakkel a tulong ti ar-aramiden da a panagturong kadagiti barangay tapno tudukan ti anti-rabies vaccine dagiti taraken nga aso ken pusa.
Malaksid iti daytoy, adda pay dagiti maiwaywayat a veterinary mission ken iti kaada iti animal pound ditoy ciudad.
Mainaig ti daytoy, kunana a silulukat ti oposina da tapno agbakuna kadagiti taraken nga aso ken pusa.
Kabayatanna, kiniddaw ni Dr. Licudine ti agtultuloy a kooperasion dagiti umili tapno maliklikan ti panagwaras ti rabies ditoy ciudad kangrunaan na ita a kapudot iti panawen.
Immunan nga inpakaammo ti City health Office nga awan pay ti kaso ti human rabies ditoy ciudad ti Laoag.
