LAOAG CITY – Ipatpatungpalen ti local a gobierno ditoy siudad ti Laoag dagiti masapol para iti panagbalinna daytoy nga Smart City.
Segun ken ni Mrs. Ruby Ann Bunalade, mangidadaulo ti City Planning and Development Office ditoy siudad nga in-inot ti panagbalin ti Laoag nga Smart City.
Inbatadna a babaen ti panangipatungpal ti lokal a gobierno kadagiti nagduduma a proyekto ken inobasion ket makitan ti dakkel a nagbaliwan iti siudad.
Inlawlawagna a kabayatan ti panagturongda idiay Taipei, Taiwan ket ditoy a naadalda dagiti aramiden tapno mapagbalin ti maysa a komunidad kas maysa nga Smart City.
Kunana a babaen kadagitoy a nasursuroda ket in-inot a maipatpatungpal ditoy siudad ti Laoag kas ti pangipaadal kadagiti mannalon kadagiti baro a teknolohia a mausar iti panagtalonda, pannakasaluad iti aglawlaw, pannakamanihir a nasayaat ti basura babaen ti kaadda ti sanitary landfill iti siudad a maibilang kas maysa a kadakkelan iti intero a rehion uno ken dadduma pay.
Kabayatanna, naammoan nga immuna metten a nakikammayet ti lokal a gobierno ditoy siudad iti Department of Science and Technology para iti nadurdur-as pay a siudad.
