LAOAG CITY – Makakatawa ni Vice Mayor Rey Carlos Fariñas gapu ta naobserbaran na a kanayun nga iyal-alokaran ti gobierno lokal ti pondo a maigatang ti bulldozer ngem awan met ti magatgatang.
Kunana a sipod nagtugaw kas bise mayor idi 2022 ket kanayon na a makita pondo a maigatang ti bulldozer iti proposed budget.
Inbatad na nga ita a tawen ket umabot ti sumurok-kumurang nga 68 a milyon a pisos ti mare-align a budget ken maysa manen ti bulldozer a maiyalokaran ti pondo nga umabot iti P5.4 milyon a pisos.
Inpakaammo na a basar kadagiti nakasarsarita na ket kanayon a mapaay ti city government iti bidding ti nasao nga heavy equipment gapo ta nababa unay ti pondo da.
Nupay kasta, kuna ti bise mayor nga ita a tawen ket nakisarita ti local chief executive iti mismo a supplier ti bulldozer ket namnamaen na a babaen iti daytoy ket naan-anayen a makagatang ti city government iti nasao nga heavy equipment.
Patien na a napateg a makagatang ti city government iti nasao nga heavy equipment gapo ta dakkel a makatulong aglalo no adda dagiti mapasaran a kalamidad ditoy ciudad ti Laoag.
