LAOAG CITY – Mangiyuswat ti lokal a gobierno ditoy ciudad ti Laoag iti medical mission iti multi-purpose hall intono Pebrero 25, 2025 a mangrugi iti oras ti alas-otso ti bigat agingga iti alas-singko ti malem.
Daytoy ti inpakaammo ni Dr. Rodrigo Catcatan, ti City Health Officer ditoy ciudad ti Laoag.
Inbatad na a karaman kadagiti maipaay ket ti serbisyo medikal, dental, feeding program, operation tuli wenno panagkugit ken dadduma pay.
Iti agdama, saan pay a masinunuo ni Catcatan nu mano ti bilang dagiti agbalin a benepisyaryo iti maiyuswat a medical mission ngem inpasigurado na a daytoy ket para iti amin a residente ditoy probinsiya.
Ti medical mission ket pagbibinnuligan iti Philippine Nurses Association, TamPA Bay, Florida and Ilocano USA, Gulf Coast, Lokal a gobierno ditoy ciudad, Philippine Red Cross – Ilocos Norte Chapter, ken ti City Health Office.
