LAOAG CITY – Nagun-od ti lokal a gobierno ditoy siudad ti Laoag ti Most Prompt and Accurate Submission of Q1 to Q4 2023 Quarterly report on real property assessment kabayatan iti Year-end Assessment Conference and Recognition of Top Performing LGUs of Region a naiyuswat idiay Eastwood Richmonde Hotel, Quezon City.
Segun iti lokal a gobierno, nagun-odda daytoy a pammadayaw gapu iti napaspas a panagtrabaho dagiti empleado.
Kunada nga addaanda ti time frame nga agtrabaho tapno maisubmitir iti usto nga oras dagiti report a kasapulan.
Malaksid iti daytoy, nagun-od pay iti lokal a gobierno ditoy suidad ti Top 1 kadagiti amin a siudad iti Rehion 1 maipapan iti Highest Average Increase in Tax Assessed Value for Fiscal Year 2021-2023.
Daytoy ket babaen ti Office of the City Assessor gapu ta inngatona ti assessed appraisal value dagiti real properties a dakkel ti maitulongna kadagiti makinkukua.
Kabayatanna, basar iti lokal a gobierno a dagitoy a pammadayaw ket panangbigbig iti panangikagumaan ti City Assessor’s Office ken ti City Treasurer’s Office a dakkel ti naitulongna iti pannakagun-od ti panagdur-as ti amin a programa a maisaysayngkat para iti pagsaayatan iti komunidad.
