LAOAG CITY – Inbatad ni Mayor Rafael Benemerito iti ili ti Pagudpud nga ibakbaklay amin ti municipyo ti magastos dagiti mapan da sukunen iti border control iti ili da kasta met iti ili ti Badoc.
Inpasingked na a sipud nangrugi ti quarantine ket awan pulos ti baybayadan dagiti kailian da, manipod iti papanda panangsukon iti border control agingga a maeksamen ken iti panagtalinaed dagitoy iti quarantine facility iti uneg ti 14 nga aldaw.
Reaksyon daytoy ti mayor mainaig iti nagbalin a rakurak ni DILG Undersecretary Jonathan Malaya a masapol a saanen a pabayadan ti Local Government Unit (LGU) ti medical certification dagiti kailian da.
Iti agdama, kuna ti mayor nga adda pay ti 21 a residente nga agdama a naka-quarantine iti ili ti Pagudpud.
Innayon na nga adda pay dagiti padpadaanan da a sumangpet a kailian da manipod iti ruwar ti probinsya.
