LAOAG CITY – Plano ti lokal a gobierno a pilaan ti kaso ken ideklarar a persona non grata ti maysa a vlogger kalpasan a nag-video ken nagipadamag ti saan nga umno nga impormasion mainaig iti municipal beach park iti ili ti Pagudpud.
Inlawlawag ni Atty. Corpuz, Municipal Administrator, ti impormasion nga 600 a pisos ti dua nga oras para iti entrance fee ket saan a pudno.
Inbatadna a daytoy ket para iti cottage iti oras ti 8:00 ti bigat agingga 6:00 ti rabii kalpasan a daytoy ket adda ti nayon a 100 a pisos iti kada oras.
Inlawlawagna nga adda ti environmental fee a 50 a pisos iti tunggal indibidual, 40 a pisos para kadagiti senior citizen, Person’s With Disability ken estudiante, 25 a pisos met para kadagiti agtawen ti 8 agingga 12.
Daytoy ket nakaiyataday iti Municipal Ordinance No. 2025-039 a mangipalubos iti lokal a gobierno nga agkolektar iti nasao a bayad.
Inpettengna a saan pay a ti mismo a vlogger ti napan nag-inquire iti front desk no diket ti driver-na.
Mamati a daytoy nga inaramid ti nasao nga indibidual ket para iti content laeng.
