LAOAG CITY – Inpakaammo ni Mayor Rommel Labasan nga adda ti nakasagana a pondo a maipaay a tulong kadagiti umili iti ili ti Pinili kangrunaan na dagiti tricycle driver ken mannalon.
Segun iti mayor, maawatan da ti marikrikna dagiti maseknan nga umili iti agdama gapu iti mapaspasaran nga oil crisis wenno nangato a presyo ti gasolina nga epekto ti agtultuloy a tension iti Middle East.
Kunana a kasapon laeng iti panaguray dagiti umili iti pannakaibunong ti ipaay da a tulong gapu ta umuna pay laeng iti gobierno national a mangipaay ti cash assistance tapno nasursurot ken masigurado a saan a madoble- doble.
Inbatad na nga iti agdama a sitwasion ket kasapolan iti naan-anay a panagkikinnaawatan ken kooperasion tapno maliklikan ti panagririri wenno tumaod a problema iti panagawat kadagiti tulong a maipadpadanon kadagiti maseknan.
Mainaig iti daytoy, kuna ni Labasan nga iti agdama ket tingtingitingen da a nasayaat no rumbeng a maipangato ti plete iti tricycle iti ili ti Pinili.
Malaksid kadagiti tricycle driver, inpakaammo ti mayor a maiyur-uray manen ti pannakaibunong dagiti kagamitan para kadagiti mannalon kas ti abono, hose ken fuel subsidy.
Kabayatanna, kuna ni Mayor Labasan a saan man a maiteg amin a kidkiddawen dagiti umili gapu ta adda ti masursurot a proseso ngem ikarkarigatan da nga alay-ayan ti mapaspasaran a kinarigat ti panagbiag dagiti residente iti ili ti Pinili.
