LAOAG CITY – Nagatendar ti lokal a gobierno iti ili ti Sarrat iti Family Week Celebration and Awarding of Model Families 2025 a naisayangkat iti Ilocos Norte Centennial Arena.
Segun ken ni Mayor Ralph Conrad Medrano, nagatendar isuna tapno maiparikna ti suportana kadagiti pamilia a nangrepresentar iti ili ti Sarrat.
Inbatadna a dagiti pamilia a nangirepresentar iti ili ti Sarrat ket addaan ti panagayat, panagkaykaysa ken natibker a pamilia.
Kunana a ni Mr. and Mrs. Policarpo S. Borromeo Jr. manipud iti Barangay 22, Sarrat ket nangiyawid ti pammadayaw iti nasao nga ili kalpasan a nagun-odda ti maikatlo a puesto iti professional category.
Binigbigna pay ni Mr. and Mrs. Noriel C. Ganal manipud iti Barangay 16, Sarrat a nangirepresentar ti OFW Category a mangsarming ti kinatibker dagiti overseas Filipino a pamilia.
Namnamaenna a dagitoy ti agsebi nga inspirasion iti sabali a pamilia iti ili ti Sarrat tapno aginayan-ayat ken agtitinnulong iti animan a mapasamak.
