LAOAG CITY – Inpakaammo ni Mayor Ralph Conrad Medrano a plano ti lokal a gobierno iti ili ti Sarrat a mangipasdek ti maikadua a munisipio iti south of the river iti nasao nga ili.
Segun kenkuana, daytoy nga addang ket aramidenda tapno matulungan dagiti residente iti south of the river tapno saan a marigatan dagitoy a mangala kadagiti kasapulanda iti munisipio kas kadagiti nagduduma a dokumento pakairamanan ti panagkiddaw ti tulong.
Inbatadna a ti panagpleteda nga agturong iti agdama a munisipio ket usarenda lattan ti nayon a pagkasapulanda iti inaldaw-aldaw a panagbiag.
Inlawlawagna a nagbabawi ti kasarsaritada a mangilako ti dagana a pakaipatakderan koma ti baro a munisipio.
Nupay kasta, inpanamnama ti Mayor nga agtultuloy nga agbirukda ti sabali a lote tapno magun-od daytoy nga arapaapda.
