LAOAG CITY – Plano ti Local a Gobierno iti ili ti Solsona a gumatang ti nayon a reaper para kadagiti mannalon.
Segun kenni Vice Mayor Jonathan De Lara iti ili ti Solsona, saan a makaumanay dagiti reaper a naipaay kadagiti grupo dagiti mannalon a pagsisinublatan da, rason a mangupa da pay ti reaper iti sabali a lugar.
Kunana a dakkel ti singiren da kadagiti mannalon, gapu ta P150 agingga iti P200 ti kada sako ken saanen a sharing daytoy.
Inbatad na a ti dati a singsingiren ti municipyo kadagiti bumulod ti reaper ket 20 ribo a pisos no aggapo iti ruwar ngem no aggapo iti ili ti Solsona ket 10 ribo a pisos.
Nupay kasta, nasukatan daytoy idi nagbaliw ti administrasyon no sadinno a ti dati a 20 ribo a pisos ket nagbalin a 10 ribo a pisos ken ti 10 ribo a pisos ket nagbalin a 5 ribo a pisos.
Mainaig iti daytoy, mamati ti bise mayor a panangparigat unay kadagiti mannalon ti nangina a pagupa ti reaper gapu ta uray adda dagiti ipaay ti gobierno ket saan da met a makapaggigiddan nga agusar.
