LAOAG CITY – Marigatan a mangiyimplementar ti lokal a gobierno iti ili ti Pasuquin iti panagbalin na a 1st class municipality.
Daytoy ti inrakurak ti Mayor kalpasan nga agpapan ita a gundaway ket saan pay a naapaprobaran ti annual budget ti nasao nga ili para iti tawen 2025.
Kunana a naipaima daytoyen iti Sangguniang Bayan ken umanamong ti kaadwan a Sangguniang Bayan Members nga aprobaran daytoy ngem maipagarup a saan a kayat ti Vice Mayor ken rumrumuar nga ungungtan ken butbutngen na ti dadduma kadagitoy.
Nupay kasta, dakkel tio pammati na a mamolpolitika ti bise mayor rason a saanna kayat nga aprobaran ti budget.
Segun iti mayor, nakailanad ti nasao nga annual budget ket dagiti kiddaw dagiti nagduduma a barangay iti ili ti Pasuquin pakairamanan ti street lights ken barangay roads.
Innayonna a saan kuma a kastoy ti mapasamak ken rumbeng nga agtitinulong da gapu ta ti araramiden da ket para iti pagsayaatan dagiti residente iti nasao nga ili.
Inpakaammona nga umabot iti P235-M iti nakailanad iti annual budget.
Maipalagip nga immununan nga inrakurak ni Mr. John Dancel, Tourism Officer iti ili ti Pasuquin a saanda marugian ti panagsanay da para iti Tan-Ok festival gapo iti saan pay a pannakaaproba ti annual budget iti nasao nga ili.
