LAOAG CITY – Dakkel a pannubok para iti lokal a gobierno iti ili ti Vintar ti agdama a situasion ti danom iti Bislak River.
Segun ken ni Mayor Richard Degala iti nasao nga ili, kalpasan a bimmaba ti danom ti karayan ket nangitunda daytoy ti resulta iti tikag kadagiti kataltalonan nangruna iti North Main Canal Irrigators Association gapu iti El Niño phenomenon.
Inbatadna a masapol nga agtultuloy ti panagmula ti kaykayo kadagiti kabanbantayan tapno agtalinaed nga adda ti danom iti Bislak River.
Inlawlawagna a nasdaawda gapu iti kellat a panagbaba ti lebel ti danom iti nasao a karayan ken napagsasaritaan ti lokal a gobierno a masapol daytoy a maikkan ti madagdagus a solusion tapno saan nga agtalinaed ti agdama a situasion ti karayan ti nadakamat nga ili.
Kunana a tulungan ti lokal a gobierno dagiti naapektaran a mannalon nangruna kadagiti nadadaelan ti mulada a pagay iti daytoy a crop season.
Innayonna nga adda ti wagas nga ar-aramiden ti lokal a gobierno kalpasan a naawatda ti pundo idi napalabas a tawen ken agibunongda ti water hose, mangipasdek ti solar irrigation pump ken ti krudo para kadagiti water pump tapno maalay-ayan ti gastosen dagiti mannalon iti nasao nga ili.
Kabayatanna, manamnama nga iti masakbayan ket adda ti tulong manipod iti gobierno lokal ken gobierno nasional tapno masolbar ti agdama a a parikot dagiti mannalon.
