LAOAG CITY – Rinugyan metten ti lokal a gobierno iti ili ti Vintar nga inyimplementar ti 4-day work week.
Daytoy ti inbatad ni Mayor Richard Degala iti ili ti Vintar, no sadinno a kunana a ti nasao nga addang ket kas panangsurot da iti direktiba ni Presidente Ferdinand Marcos Jr. tapno makainot ti enerhiya.
Inbatad ti mayor a napagsasaritaan dan no kasanu ti aramiden da tapno makainot da ti kuryente.
Karaman ditoy ti pananglukat da laeng iti aircon mangrugi iti oras ti alas-9 ti bigat agpatingga iti oras ti alas-5 ti malem, ken masapol a ti laeng kalamiis na ket 24 degrees.
Innayon na nga amin dagiti dokumento wenno papeles a nasken a maipa-receive iti Commission on Audit ken dadduma nga opisina ditoy ciudad ti Laoag ket mamma minsan ken maymaysa laengen a lugan ti munisipyo ti mausar iti pannakaibiyahe dagitoy.
Inpasingked ti mayor nga aramiden da amin a kabaelan da tapno makainot ti enerhiya ken ngem saan a maapektaran ti operasyon ti lokal a gobierno iti ili ti Vintar.
