LAOAG CITY – Linawlawagan ni Mr. Ronald Estavillo, Manager, ti Laoag International Airport (LIA) a proyekto ti gobyerno probinsiyal ti manarimaan a maipaspasdek nga extention ti linong ti arrival area.
Segun pay ken ni Estavillo, uray ti manarimaan a maipaspasdek a “catwalk” manipud iti opisina ti PAGASA agingga iti pagserkan ti Bgy. Araniw ket proyekto ti kapitolyo.
Gapu iti daytoy, nagyaman ni Estavillo ken ni Gov. Imee Marcos gapu iti tulong nga ipapaay da iti eropuerto.
Kuna ni Estavillo a malaksid iti gobyerno probinsiyal a tumultulong iti pannakaipadur-as ti eropuerto ket adda da pay dagiti sabsabali nga ahensiya a tumultulong.
Inbatad ni Estavillo, a dagiti manarimaan maipaspasdek a proyekto ti nasao nga eropuerto ket adda da improvement ken adda da repair ken adda da met dagiti baro.
Segun kenkuana, kas iti waiting area, unloading ken loading a napunduan ti 1 a million a pisos.
Kuna na na kasapulan ngamin ti pannakatarimaan ti flooring na ken ti pannakasemento ti extention ti parking area iti exit a paset na gapu ta no agtudo ket nalubo ken malayos ken masilawanto payen.
Inlawlawag pay ni Estavillo a ma- landscape ti sango ti terminal building ken maiyaramidan ti canal ti parkingan ti eroplano a kumamang iti main kanal a kumamang iti karayan.
Kuna pay ni Estavillo a maplanplano ti pannakaaramid ti baro nga administration building ti eropuerto.
Innayon pay ni Estavillo, nga adda ti simmangpet a baro a baggage trolley nga umabot ti 48 a pedaso a mausar kalpasan a naobserbaran nga agkurkurang daytoy.
