LAOAG CITY – Sinuspenso ni Liberian President Joseph Boakai ti nasurok nga 450 a top government officials, pakairamanan dagiti ministers gapu iti pannakaipaay da a nangideklarar ti amin nga assets da iti anti-corruption agency.
Inbatad ni Presidente Boakai a saan a sumrek iti trabaho ken awan ti maawat da a sweldo dagiti maseknan agingga a saan da nga isumitir ti pakabuklan dagiti sanikua da.
Inpetteng ni Boakai a dagiti nadakamat nga opisyal ket linabsing da ti code of conduct para iti state officials babaen ti saanda a panagbalin a transparent iti sanikua da.
Maipalagip a ti kangrunaan nga inkari ti presidente iti panagtugaw na iti posisyon na ket parmeken na ti korapsyon iti pagilian da.
Karaman kadagiti nasuspenso ket dagiti ministers for education and health, special envoys for tourism and investment, kasta pay dagiti opisyal iti Executive Mansion, ken dagiti county administrative officials.
Inpaganetget ti presidente nga adda ti linteg iti pagilian da nga amin a public officers ket rumbeng nga ideklarar da amin a pakabuklan ti kinabaknang da sakbay nga agtugaw da iti pwesto ken iti ipapanaw da iti posisyon da iti gobierno.
