LAOAG CITY – Inbatad ni Mrs. Marisa Alcantara, ti Provincial Director iti TESDA-Ilocos Norte nga adda dagiti accredited schools ditoy probinsya a mangididiaya ti Driving NCII.
Inbaga ni Alcantara a dagiti accredited schools a pakairamanan ti Marcos Agro-Industrial School iti ili ti Marcos ken Bangui Institute of Technology iti ili ti Bangui ket mangipaay ti libre a driving lesson babaen iti Training Forward Scholarship Program (TFSP) ti TESDA.
Segun ken ni Alcantara, dagiti mabalin a manggundaway iti daytoy a kurso ket dagiti agtawen ti 18 agpangato ken agpaot ti panagklase dagiti manggundaway iti uneg ti 15 nga aldaw.
Innayon nga iti kada klase wenno batch ket 15 ti minimum idinto a 25 ti maximum.
Kuna na a nangrugin ti umuna a batch para iti daytoy a kurso ken ti sumaruno a batch ket iti umay a bolan no sadinno a dagiti mapan agpailista ket “First come, first serve”.
Inpakaammo ni Alcantara a dagiti kasapulan a requirements para kadagiti mayat a manggundaway iti nasao a kurso ket birth certificate a mangipaneknek a daytoy ket agtawen ti 18 agpangato, high school card, diploma wenno Transcript of Record no nagturpos ti kolehiyo, 2×2 picture ken passport size.
Inpasingked ni Alcantara nga awan ti bayadan dagiti mayat a manggundaway iti nasao a kurso gapu ta daytoy ket adda iti babaen ti scholarship program ti TESDA.
