LAOAG CITY – Inpasingked ni Mayor Aldrin Garvida iti ili ti Nueva Era nga agtultuloy ti panangipaayda kadagiti tulong para kadagiti mannalon kas ti panangibunong ti libre a ganagan.
Inbatadna a kalikagumda pay a mangilatang ti pundo tapno nayon a tulong para kadagiti mannalon kas ti pananggatang ti baka a dandanin nga aganak tapno maikkan ti pamastrekan dagiti umili nangnangruna kadagiti pamilia nga agpapaadal ti annakda.
Kunana a napanunutanda a baka ti maited kadagiti umili gapu ta basar iti kapadasanda ket saan nga umdas iti pagbirukan dagiti maseknan a pamilia ti panagtaraken ti kalding ken manok.
Inlawlawagna a nangiyalokarda ti lima a milyon a pisos para iti nasao a proyekto ken maikagumaan a maipatungpal daytoy ita a tawen ken iti sumarsaruno pay a tawen.
Innayon ni Mayor Garvida, kalikagum ti lokal a gobierno a matulungan dagiti marigrigat a pamilia iti ilida tapno agtultuloy a makaadal dagiti annakda agingga nga agbalin dagitoy a propesyunal ken mangted inspirasion kadagiti dadduma a kailian.
