LAOAG CITY – Inpakammo ti Department of Transportation nga adda ti maipaay a libre a pagluganan kadagiti apektado a pasaheros iti transport strike nga isyuwat ti grupo a Piston ken Manibela mangrugi intono bigat agingga iti Biyernes.
Segun kenni Department of Transportation Acting Secretary Giovanni Lopez, ti Philippine Coast Guard, Philippine Ports Authority ken Metropolitan Manila Development Authority dagiti karaman a mangipaay ti libre a pagluganan.
Inbatad na nga idi Domingo pay laeng ket nagsagana dan ken nakasarita dan ni MMDA chairman Don Artes para iti daytoy.
Adda pay ti pammilin iti Land Transportation Franchising and Regulatory Board nga ammoen dagiti posible nga apektado a ruta kabayatan ti transport strike.
Maipalagip nga inrakurak ti Piston ti nationwide transport strike na inton Huwebes, September 18 kas protesta kontra iti kurapsyon partikular kadagiti iregularidad iti flood-control projects ti gpobierno.
Ti met Manibela ket mangiyuswat ti strike iti tallo nga aldaw mangrugi intono Miyerkules, Setyembre 17 agingga iti Biyernes, Setyembre 19.
