LAOAG CITY – Nagbibinnulig ti Provincial Veterinary Office, City Veterinary Office ken iti Mariano Marcos State University a nangiyuswat ti libre a bakuna kontra rabies ditoy probinsia.
Segun kenni Dr. Mark Stephen Ballog, ti Associate Profession 2, daytoy nga inisyatibo ket paset iti tarigagay da a maiyadayo iti sakit dagiti taraken dagiti umili.
Inbatadna a malaksid iti naiyuswat a libre nga Anti-rabies Vaccination ket naipatungpal pay ti panagpurga, consultation, Rabies Advocacy, Pet Buffet, panagkapon, seminar ken dadduma pay.
Mamati ni Ballog a babaen iti daytoy ket add-adda pay a maipaawat kadagiti umili nga addaan ti taraken nga aso ken pusa iti kinapateg ti naan-anay a panangtaripato kadagiti dingwen.
Mangnamnama ni Ballog a babaen kadagiti ar-aramiden da nga addang ket narigrigat a kapten ti aniaman a klase ti sakit dagiti ayup tapno malapdan ti panagngato ti rabies ditoy probinsia.
