LAOAG CITY – Mangidiaya ti gobierno probinsial ti Ilocos Norte ti libre a serbisio ti shuttle para kadagiti agsangpet iti Laoag International Airport.
Segun ken ni Atty. Athena Nicolette Pilar, mangidadaulo ti Metro Ilocos Norte Council wenno MINC a paset daytoy iti kalikagum ni Gob. Matthew Marcos Manotoc a makitinnulong iti Phil. Airlines a mangipaay ti napintas a serbisio kadagiti kakailian.
Inbatadna a maidiaya ti nasao a serbisio iti daytoy a semana santa manipud idi kalman, Abril 5 ken agpatingga intono Domingo, Abril 9.
Kunana a dagiti mangipaay ti libre a shuttle ti mangitulnog kadagiti pasahero ti Phil. Airlines kadagiti pagtarusan dagitoy a hotel.
Inlawlawag ni Pilar a paset daytoy iti ganuat ti gobierno probinsial a mangipaay ti napintas a serbisio iti publiko ken maipasigurado a saan nga agparikut dagiti turista ken sangsangaili ditoy rehion nga agsangpet iti Laoag International Airport.
Innayonna a naiget ti direktiba ti gobernador kadakuada iti Metro Ilocos Norte Council a masapul a tumulong a mangisigurado a natalged, komportable ken awan ti pagparikutanda dagiti pasahero ti Phil. Airlines apaman a makasangpetda iti Laoag International Airport.
