LAOAG CITY – Indasar ni Senador Christopher “Bong” Go ti Senate Bill No. 2983 a gagem a maipaayan ti Philippine Health Card dagiti amin a Pilipino tapno maipasigurado nga agtultuloy ti access kadagiti serbisio iti salun-at iti babaen ti National Health Insurance Program (NHIP).
Daytoy a gakat ket kas solusion iti PhilHealth registration ken mangpapigsa pay iti pannakaipatungpal ti Universal Health Care (UHC) Law.
Inpetteng ni Go a kasapulan a maaddaan dagiti amin a Pilipino ti tangible proof ti membership-da iti PhilHealth tapno maiyalisto ti panangala kadagiti benepisyio iti babaen ti National Health Insurance Program.
Basar iti datos ti PhilHealth, amin a 112.89 a milyon a Pilipino ket sakupen ti National Health Insurance Program a mangikeddeng ti coverage rate iti 100%.
Nupay kasta, iti panagngudo ti 2023, 96% laeng ti Pilipino ti pormal a nakarehistro iti PhilHealth idinto a nabati ti sumurok-kumurang a 4.52 milyon nga indibidual nga awan ti umiso a dokumentoda.
