LAOAG CITY – Nangipaay ti libre nga school supplies dagiti lider nga agtutubo iti probinsia ti Ilocos Norte kadagiti agad-adal sakbay ti panaglukat ti pagadalan inton Hulio 29 babaen ti “Kits4Kids” Community Outreach Program.
Segun ken ni Sangguniang Kabataan (SK) Chair Hans Jelden Tabiolo ti Barangay 5 San Silvestre ili ti San Nicolas a mabalin nga agparehistro ti estudiante iti village hall ken mangitugot iti pammaneknek ti panagpalista tapno ma-avail ti libre nga school supplies.
Kunana a mangipaayda kadagiti libre nga school supplies tapno matulongan dagiti agtutubo nga agad-adal nga agsagana para iti panagsublida iti panagadal.
Inlawlawagna a simple laeng a wagas daytoy a mangpalag-an iti nadagsen kadagiti pamilia ken masigurado a tunggal ubing ket addaan kadagiti ramit a kasapulan.
Mainaig iti daytoy, inpakaammona a nangrugi idi Lunes ti panagrehistro para kadagiti estudiante ti Kinder agingga iti Grade 6.
Nupay kasta, gapu iti limitado a suplay, kinunana a ti pannakaiwaras ket iti first-come, first-serve basis ken eksklusibo laeng kadagiti taga-Barangay 5.
Iti pannakitinnulong kadagiti publiko ken pribado a maseknan, ti SK Ilocos Norte, nga idadauluan ni Mr. Eldritz Viernes ket nakadanon kadagiti adayo a sitio.
Naammoan a ti proyekto ket immun-una a nagturong kadagiti nasulinek a sitio iti ili ti Vintar, Adams ken Pagudpud a nakabenepisiaran ti sumurok 100 nga immawat no sadino ti maikalima a komunidad a nadanon ket ti Barangay Alay iti ili ti Badoc.
Iti panagbitla ni Viernes, kunana nga agyamanda unay iti gobierno probinsial ti Ilocos Norte iti panangipaayna iti logistical assistance kadagiti nagdumaduma a programa ken operasion ti pederasion kas iti proyekto a Kits4Kids.
Malaksid iti daytoy, makaala pay dagiti ubbing iti food packs, multivitamins ken medical checkups.
Kabayatanna, segun ken ni Ms. Valerie Talamayan, Information Officer ken Senior Education Program Specialist ti Schools Division ti Ilocos Norte, manamnama ti 82 a ribu nga enrollees kadagiti public schools ita a tawen.
Iti agdama, kunana nga addan ti 46,618 nga enrollees ken namnamaen ti Department of Education – Ilocos Norte nga umadu ti bilang dagiti enrolment inton sumaruno a lawas babaen ti “Brigada Eskwela” pre-opening preparations inton Hulio 22 agingga 27.
