LAOAG CITY – Balligi ti naiyuswat a drug buy bust operation iti Barangay 20 iti ili ti Sarrat babaen iti Provincial Drug Enforcement Unit (PDEU), INPPO, ken ti PNP-Sarrat.
Binigbig ni Police Chief Master Sergeant Harold Nicolas, mangidadaulo ti PDEU ti suspek a ni Benigno Menrige alyat Bonet, agtawen ti 49 ken residente iti Barangay 14 ditoy ciudad ti Laoag
Segun kenni Nicolas, idi pay laeng ummuna a paset ti 2020 ket masipsiputanen ti suspek agingga a nangiwayat da ti operasyon.
Nakumpiskar manipud iti suspek ti lima a sachet ti maipagarop a shabu nga agbalor ti lima ribo a pisos nga isu ti ginatang ti police pusuer buyer ken iti ikot na a 21 a sachet a naglaon met laeng ti maipagarop a droga ken drug paraphernalia.
Kunana ti suspek ket dati nga agtabtrabaho iti lokal a gobierno ditoy ciudad ti Laoag partikular iti DPS ken ita ket maysan a negosyante.
Inbatad na a ti suspek ket maysa nga high value individual iti INPPO, adda iti Top 10 iti Regional Watchlist iti Police Regional Office 1 ken isuna ti lider iti Menrige Drug Group nga agop-operar ditoy probinsya.
Malaksid iti daytoy, addaan pay ti suspek ti kaso a panaglabsing iti Section 11 iti RA 9165 ken nasentensyaan babaen iti Regional Trial Court Branch 13 ditoy ciudad ti Laoag ngem nakarwar gapo iti panangiyapela na iti Court of Appeals.
Mainaig iti daytoy, kuna ni Nicolas a ti natiliw iti Barangay Cabungaan-A ditoy ciudad ti Laoag iti kallabes ket miembro iti nasao a drug group.
Kabayatanna, nagkedked met nga agkomento ti nasao a suspek mainaig iti pannakatiliw na.
