LAOAG CITY – Inlawlawag ni Senate President Francis “Chiz” Escudero nga iti agdama ket awan ti plano a kissayan ti maipatpatungpal a bilang dagiti holiday iti pagilian.
Inbatad ni Escudero, ti pagannurutan ti Senado ket saan a nayonan dagiti holiday ken saan met a kissayan.
Ti rakurak ni Escudero ket kas sungbat kadagiti nagduduma a pammababalaw a naawatna iti immuna a rakurak daytoy no sadinno kunana a limitaranda ti panangaprobar kadagiti lokal a gakat maipanggep iti holiday.
Basar iti liderato ti Senado, iti agdama ket adda ti 24 agingga 25 nga holidays ditoy Pilipinas iti maysa a tawen, saan a karaman dagiti suspensiyon iti trabaho gapu iti saan a napintas a sasaaden ti panawen.
Kunana, no 22 nga aldaw laeng ti trabaho iti maysa a bulan ket arig maysa a bulan a saan nga agtartrabaho dagiti mangmangged.
Inlawlawagna a kalikagumda nga agbalin a mas competitive ti Pilipinas.
Nupay kasta, inpakaammo ni Escudero a saan a prioridad ita ti Senado iti nasao a banag.
