LAOAG CITY – Inbatad ni Engr. Shiela Opelac, ti City Agriculturist ditoy ciudad ti Laoag a saanda nga i-require ti life vest no agrenew ti permit dagiti mangngalap.
Segun kenni Opelac, awan iti mandato ti Bureau of Fisheries and Aquatic Resources (BFAR) ti panangi-recquire ti life vest kadagiti mangngalap gapu ta ti laeng dawdawaten da ket ti Old Permit to operate (CTC) ken ti panangipakita da no usto ti kadakkel ti bangka.
Inlawlawag ni Opelac a daytoy ti kurang isut gapuna a masapol a mairaman iti City Ordinance.
Nupay kasta, inbatad ni Konsehal Jason Perera a saanen a masapol ti city ordinance gapu ta adda ti provincial ordinance a mabalin a maiyaplikar iti intero a probinsia.
Kabayatanna, gapu kadagiti suhestyun a masapol ti panangipasigurado a natalged dagiti mangngalap iti itatappog da iti baybay ket i-require danton ti panangipakitada ti life vest sakbay nga i-renew da ti permit dagiti maseknan.
Mainaig iti daytoy, kuna met ni Opelac a naipalaon iti provincial ordinance a responsibilidad dagiti agtagikua ti bangka a gumatang ti bukod da a life vest.
Maipalagip a ti panagi-renew ti permi ket maiyuswat iti Enero agingga iti Marso iti kada tawen.
