LAOAG CITY – Maladingitan ni Liga ng mga Barangay President Ryan John Pascua a saan a karaman a maipaayan ti tinawen nga insentibo dagiti lupon iti pannakaaprobar ti Barangay Incentive Program para kadagiti barangay workers.
Segun kenkuana, daytoy ket kalpasan a saan nga umanay pay laeng ti nailatang a pundo ti probinsia para iti nasao a programa.
Inbatadna a malaksid kadagiti lupon ket saan pay a karaman dagiti Barangay Human Rights Action Officer.
Nupay kasta, inlawlawagna a mabalin a maamendaran ti ordinansa a nakaipalaonan daytoy nga addang tapno apaman nga adda ti makaumanay a pundo ket mabalin a mainayonton dagitoy.
Mainaig iti daytoy, kuna ni Pascua a dagiti mabenepisiaran iti daytoy nga ordinansa ket dagiti barangay workers a pakairamanan dagiti barangay tanod, Barangay Health Workers, Barangay Nutrition Scholars, Day Care Workers ken dadduma pay.
Innayonna a maipaayan dagitoy ti uppat a ribu a pisos iti kada tawen iti umuna lawas ti Disiembre.
