LAOAG CITY – Nakasaganan ti Liga ng mga Barangay ti Ilocos Norte para iti panagatendarda iti National Congress ti Liga ng mga Barangay para iti Cluster 3 a maisayangkat iti masungad a Septiembre kuatro agingga ti Septiembre sais ita a tawen 2024.
Segun ken ni Ilocos Norte ABC Federated Pres. Ryan John Pascua, uppat a gasut walopulo ket innem (486) a barangay officials ti probinsia ti kunpirmado nga agatendar iti nasao nga aktibidad kalpasan a nakabayaden dagitoy kadagiti rumbeng a mabayadan.
Inbatadna a ti orihinal a bilang dagiti nangipadanon ti kalikagumda nga agatendar ket uppat a gasut siyam a pulo ket walo (498) ngem nagbabawi dagiti dadduma gapu ta addanto dagitoy ti bakasyon iti nadakamat nga aldaw.
Kunana a dandani sangagasut a porsiento a Punong Barangay dagiti kakaduana nga agatendar kalpasan nga adda ti sumagmamano a nangibaon kadagiti “first” barangay kagawad dagitoy a mangibagi kadakuada.
Inpakaammo ni Pascua a dagiti probinsia a mangbukbukel iti cluster 3 a nakairamanan ti Ilocos Norte ket ti Antique, Cebu, Siquijor, Batanes, Cagayan, Ilocos Sur, Nueva Vizcaya, Zamboanga del Sur, Quirino ken dagiti highly urbanized City kas iti Bacolod, Cebu, Mandaue ken Lapu-lapu.
Inlawlawagna a ti class 3 ket adda dagiti probinsia manipud iti Luzon, Visayas ken Mindanao.
Kunana a maysa kadagiti kangrunaan a mapagsasaritaan ket ti kalikagum a maiyatiddog ti termino dagiti barangay officials manipud iti agdama a tallo a tawen ket mapagbalin nga innem a tawen.
Inlawlawagna a mangisayangkat dagitoy ti “signature campaign” kas suporta iti inpila ni senador Imee Marcos a gakat a Senate Bill 2629.
Mangnamnama ni Pascua a babaen iti pannakaiyatiddog ti termino dagiti barangay officials ket adda dagiti makita a maileppas a proyekto kadagiti barangay.
Innayonna a babaen pay iti daytoy ket addan ti paglintegan a masurot iti kapaut ti panagserbi dagiti barangay officials.
