LAOAG CITY – Pimmusay ti maysa a babai a masikog kalpasan a nadesgrasya da iti asawa na iti paset ti Brgy. Carusipan iti ili ti Pasuquin.
Nabigbig ti babai nga agtawen ti 30 idinto a ti asawa na ket agtawen ti 29, agpada dagitoy a residente iti nadakamat a barangay.
Basar iti imbestigasyon ti PNP-Pasuquin, agpapaamianan a direksyon dagiti agassawa a naglugan ti motorsiklo idi ta nadungpar da ti maysa a ligay ti truck nga adda iti tengnga ti kalsada.
Gapu iti daytoy, natumba ti motorsilko ken dita a naibaot ti ulo ti babai iti kalsada.
Naitaray iti ospital ti babai ngem naideklara a comatose agingga a pimmusay.
Naamoan a naggapo iti pagayamda dagiti agassawa ken awana ti suot nga helmet dagitoy idi napasamak ti desgrasya.
Kabayatanna, inpakammo ni PLt. Roi Manuel Ordonio, ti hepe ti PNP-Pasuquin a ti ligay a niawarang iti kalsada ket inpan ti maysa a lalaki a nagwalwala bayat nga adda iti impluwensya ti nasanger.
Kuna a na natiliw a dagus a nadeterminar ken natiliw ti nagwalwala a lalaki kalpasan nga adda ti nakakita ti inaramid na.
Nagtalinaed daytoy iti kustodyar ti PNP bayat a maisagsagana ti maipila a kaso nga homicide kontra kenkuana.
