LAOAG CITY – Natiliw dagiti otoridad ti uppat manipod kadagiti lima a babbai a nagsusugal iti Sitio Tanap, Barangay Macayepyep iti ili ti Banna.
Nabigbig dagiti biktima nga agtawen ti 42, mannalon; agtawen ti 48, naasawaan, Barangay Health Worker; agtawen ti 24, balo ken agtawen ti 66, awanan ti asawa idinto a ti nakalibas ket addaan ti umno a tawen; agpapada dagitoy a residente iti nadakamat a barangay.
Basar iti Philippine National Police iti ili ti Banna, nakaawat da ti report nga adda dagiti agsusugal iti balay ti maysa kadagiti suspek isut gapuna a dagus da a nagresponde iti lugar tapno iberipikar ti naawat da a report.
Apaman a nakadanun dagiti otoridad ti lugar ket ditoy a naaktwan da dagiti suspek nga agsusugal a nakatiliwan da kadagiti uppat idinto a nakalibas ti maysa.
Nakumpiskar dagiti otoridad iti lugar ti 5 a pedaso ti 500 peso bill, 6 a pedaso ti 50 peso bill, maysa a 20 peso coin, pito a pedaso ti 10 peso coin, 14 a pedaso ti 5 peso coin, 5 pedaso ti 1 peso coin, maysa a set ti baraha, lamisaan, maysa a bath towel ken dua a mono block.
Manamnama a mapilaan ti maiyannatop a kaso dagiti nadakamat a suspek.
