LAOAG CITY – Nakarikna ti panagbuteng dagiti lima a kapitan iti ili ti Sarrat kalpasan a nakaawat da ti nakabutbuteng a regalo.
Naammuan a naglaon ti regalo kadagiti banggal, kandela a naribonan ti nangisit, pin ken nangisit a manto.
Segun iti Philippine National Police iti ili ti Sarrat, dagiti nasao a barangay kapitan ket nabigbig nga isuda Brgy. Kapitan Arniel Paulino iti Brgy. 1 San Joaquin; Brgy. Kapitan Richard Agpaoa iti Brgy. 11; Brgy Kapitan Agnes Dominggo iti Brgy. 12 San Bernabe; Brgy kapitan Jil Aguilar ti Brgy 16 Sto. Santiago; ken Brgy kapitan Reynante Hermano iti Brgy 24 San Roque.
Kuna dagiti otoridad a naggigiddan a nagturong iti opisina ti pulisya dagiti nasao nga opisyal ti barangay tapno ireport ti pakaseknan iti naawat da a regalo.
Inpetteng da a basar iti panakisarsarita da kadagiti opisyal, nagduduma a bersyon nu kasano a naawat dagiti kapitan iti nasao a regalo.
Inlawlawag da nga adda dagiti mangibaga a naawat da daytoy babaen iti panangipurwak ti limmabas a nakamotorsiklo, nangibati iti barangay hall, adda ti nangiyawat iti Brgy. Tanod, ken dadduma pay.
Iti pinagturong ti Bombo Radyo Laoag iti pagtaengan ni Brgy. Chairman Richard Agpaoa, inbatad ti asawa na nga immuna a nakaawat ti kapitan ti text message nga agsalsaludsod no naawat nan ti regalo ken anusan na daytoy.
Kabayatanna, kunana apaman a naawat ti asawa na daytoy ket rimuar ngem awan ti regalo ti sangwanan ti pagtaengan da ngem kalpasan ti sumagmamano nga oras ket ditoy nga adda ti indanon dagiti karruba da a regalo a nalukatanen ken nakigtot da iti linaon ti regalo.
Mainaig iti daytoy, agtultuloy pay laeng iti imbestigasyon ti Philippine National Police iti nadakamat nga ili tapno maamoan ti pakabigbigan dagiti naggapwan dagiti regalo ken no anya ti motibo dagitoy.
