LAOAG CITY – Inpakaammo ni P/Cpt Kester Arellano, chief of police Naka-full iti Sarrat Municipal Police Station a naka-full alert dagiti kameng a polisya sumagmamano nga oras sakbay ti paskua.
Segun kenkuana, a sipud pay a nangrugi ti simbang gabi idi Disyembre 16 ket adda ti innem a Philippine National Police personnel ti naideploy iti Sta. Monica Church pakairamanan ti dua pay a personnel a nadutukan nga agmonitor iti trapiko iti nasao nga ili.
Kinunana nga agingga ita a gundaway ket nagtalinaed ti linak, urnos ken talna ken namnamaenna nga agtalinaed daytoy agingga iti panagsarabo ti baro a tawen.
Malaksid iti daytoy, inbatadna nga agtultuloy ti panagbantay da ita a panawen ti paskua ken iti panagmonitor da kadagiti indibidwal nga agususar iti illegal a paputok pakairamanan ti boga.
Inrakurakna a nakakumpiskar da ti lima a boga iti Brgy. 23 iti ili ti Sarrat ket ubbing dagiti agik-ikot ti nadakamat a banag.
Nupay kasta, saan da a natiliw dagiti ubbing gapu ta naglibas dagitoy ken ibati da dagiti boga.
Inpakaammo na nga umabot met iti 15 a boga ti nakumpiskar dagiti otoridad sipud iti panagmonitorda.
Kabayatanna, inpetteng ti Sarrat Rural Health Unit nga awan dagiti indibidual a naitartaray iti ospital gapu iti paputok.
Nupay kasta, inpasiguradoda a nakasagana ken kumpleto dagiti ramit nga usarenda a mangtaming kadagiti induibual nga agbalin a biktima ti paputok.
