LAOAG CITY – Kaso a panagsalungasing iti PD 1602 wenno illegal gambling law ti sangwen dagiti lima a construction worker a naarestar iti naisayangkat nga anti illegal gambling operation iti maysa a minatayan iti Brgy. 2 ditoy siudad ti Laoag.
Segun ken ni PLt. Col. Rafael Lero, ti chief of police iti PNP Laoag, naaktuan nga agay-ayam ti Lucky 9 dagiti lima a suspek.
Kuna na a dagitoy ket agtawen ti 35 a residente iti Brgy. 3 iti ili ti Bacarra; agtawen ti 25, 23 ken 25, agpapada a residente iti Brgy. 2 ditoy siudad ken maysa nga agtawen ti 56 a residente iti Brgy, 19 ditoy siudad.
Innayun na a dagiti maseknan ket agpapada a contruction worker.
Nakumpiskar manipod kadagiti suspek ti 40 a pedaso ti baraha, pusta nga agdagup ti 2,480 a pisos, plastic container, bed sheet, pito a tugaw ken maysa a lamisaan.
Iti agdama ket nagtalinaed iti kustodyar ti PNP Laoag dagiti suspek.
