LAOAG CITY – Balligi a natiliw dagiti lima a miembro ti Salisi Gang kalpasan a nagtakaw da iti maysa a grocery store iti Barangay Pagdilao iti ili ti Pinili.
Segun kenni Police Capt. Kester Arellano, ti chief of police ti Philippine National Police iti ili ti Pinili, dagiti suspek ket pakairamanan ti tallo a babbai ken dua a lallaki ken tallo kadagiti lima a natiliw ket senior citizen ken residente iti San Carlos ken Dagupan City, Pangasinan.
Inlawlawag na a dagiti suspek ket nagindadamag iti agtagikua ti maysa a grocery store no sadinno sinaludsod dagitoy dagiti lako na ken ti dalan a mapan iti ili ti Banna agingga a pimmanaw dagitoy.
Nupay kasta, kunana nga eksakto met nga agur-urnos ti agtagikua iti pasdek kadagiti lako na gapo ta nagsangpet dagiti orders na idi nadlaw na a bimmasit ti lako na.
Gapo iti daytoy, dagus a rimuar ti maseknan tapno makamakam dagiti suspek ngem eksakto met a naglugan dagitoy iti behikulo ngem naala na ti plate number daytoy.
Dagus met a napan iti Philippine National Police ti agtagikua ti pasdek tapno agreport ken naibaga na iti desk officer ti plaka ti nagluganan dagiti suspek ken pamilyar iti pulis daytoy gapo ta adda met laeng ti insidente ti panagtakaw idi Setyembre.
Inbatad ni Arellano nga insigida met nga inreport ti desk officer kadagiti kakadua na a pulis nga adda iti PROTECT Box a nakabase iti Barangay Darat iti ili met laeng ti Pinili nga iti dayta a gundaway ket mangiyus-uswat ti Oplan Sita isut gapo na a nasada da dagiti suspek ken natiliw dagitoy.
Naamoan nga umabot iti 50 a ribo a pisos ti balor dagiti nagduduma a grocery items ti innala dagiti suspek iti nakadamat a pasdek.
Kuna ni Arellano a naggapo dagiti suspek iti Pangasinan ken ammo da ti pasikot-sikot iti Ilocos Norte ken rumrumuar a nawaras dagiti miembro ti gang ditoy probinsya.
Mainaig iti daytoy, kinumpirmaran ni Arellano a maysa kadagiti lima a natiliw a suspek ket addaan ti alias warrant of arrest nga inyetnag ti korte ditoy Ilocos Norte.
Dinakamat na nga iti pannakikoordenar da iti sabali a probinsya ket naduktalan a kastoy ti modus dagiti suspek ken no matiliwan dagitoy ket dagus met laeng a maareglo ti pasamak iti kallabes.
Kabayatanna, napilaan ti kaso a panagtatakaw dagiti suspek ken ita nga aldaw ti pannakaiturn-over da iti Bureau of Jail Management Penology iti ciudad ti Batac.
