LAOAG CITY – Inbilin ni Presidente Ferdinand Marcos Jr. dagiti miembro ti pulisia nga agresponde nga insigida iti lugar ti krimen a saan a lumabes iti lima a minuto.
Inbatadna a daytoy ket tapno al-alisto a makaresponde ti kapulisan iti lugar no sadinno nga adda dagiti mapaspasamak a krimen.
Iti podcast interview ti Presidente, inbilinna iti Philippine National Police (PNP) ken Department of the Interior and Local Government (DILG) a siguradoen a ti kapulisan ket asideg kadagiti tattao.
Malaksid iti daytoy, kalikagum ni Marcos a maaddaan ti police visibility tapno malappedan ti aniaman a krimen pakairamanan ti maaddaan ti unified emergency hotline para iti napaspas a panagresponde dagiti otoridad.
Kunana a no masansan a makitkita dagiti tattao dagiti pulis iti kalsada ket mariknada a natalgedda ken agbalin pay a pagayamda dagitoy.
Binabalaw ti Presidente dagiti adu unay nga emergency numbers a mangitunda ti pannakaulaw ti publiko isu a mangipatungpal ti gobierno ti single crisis hotline para iti emergency hotlines tunggal adda ti krisis.
