LAOAG CITY – Lima a pamilya iti Brgy. Susugaen iti ili ti Pasuquin ti naibakwit gapu iti agtultuloy a panagtudtudo.
Daytoy ti inpakaammo ni PMaj. Bensoli Lozano, ti hepe ti PNP-Pasuquin.
Kuna ni Lozano a namunganay ti panagbakwit dagiti maseknan a pamilya kalpasan nga adda ti panagngato ti danom nga aggapo iti bantay nga adda iti asideg ti kabalbalayan.
Inbatad na a gapu iti panagamak dagiti residente ket dagus a nagkiddaw dagitoy ti pannakaibakwit ket insegida met a pinatgan ti local a gobierno.
Kuna na a ti nasao nga addang ket dakkel a makatulong iti pagtalgedan dagiti residente nu bilang agtultuloy ti panagngato ti lebel ti danom.
Kabayatanna, inpakaammo ni Lozano a naiyakar dagiti lima a pamilya iti nangatngato a lugar ken adda ti ipapaay a tulong ti lokal a gobierno kadagitoy.
