LAOAG CITY – Positibo ti naiyuswat a search warrant operation iti Barangay Poblacion iti ili ti Nueva Era.
Nabigbig ti subject ti operasyon a ni Mr. Arbie Domingo Tamayo, foreman ken residente iti Pabahay Project Block 1, Lot 24 iti Barangay Poblacion iti nasao nga ili.
Ti search warrant ket inparuk-at ti Regional Trial Court (RTC) iti probinsya ti La Union gapo iti panaglabsing iti RA 9165.
Nakumpiskar dagiti otoridad ti lima a sachet ti maipagarop a shabu ken maysa a glass tube tooter iti ayan dagiti pinggan ken kutsara da iti kusina ti pagtaengan na.
Mainaig iti daytoy, inpetteng ni Tamayo a saan na a kukua dagiti nakumpiskar nga iligal a droga ken no adda kuma ti aramid na ket apay nga ikabil na iti ayan dagiti pinggan ken kutsara.
Inpetteng na nga awan ti ik-ikotan na ken saan nga agus-usar iti iligal a droga kageddan ti panangakusar na a naimula dagiti naala manipud iti pagtaengan na.
Inadmitir na a nagus-usar met idi napalpalabas a tawen ngem sipud binagbagaan dagiti kakabsat na ket insardeng na ti kastoy nga aramid na.
Kabayatanna, kuna met ti asawa ti subject a ni Luzviminda Parado iti operasyon a nakakaskasdaaw no apay nga iti ayan dagiti pinggan ti nakaalan dagiti iligal a droga.
Inpalgak na a kanayon nga agusar ken no pudno nga adda man iti ayan ti pinggan ket makita na latta kuma dagitoy.
Dinakamat na pay nga adda ti nakita ti anak da dua nga indibidual a nakasuot ti black a maipagarop a simrek iti likod ti pagtaengan da no sadinno ket naiwalin ti tulda nga isu ti rikep ti likod da ken napapanaw daytoy.
Kabayatanna, inpetteng ni Police Lt. Tolentino Erum Jr., chief of police ti PNP-Nueva Era a lehitimo ti naiyuswat a search warrant operation.
Daytoy ket kalpasan nga inakusaran ni Tamayo dagiti otoridad a nangimula ti maipagarop nga iligal a droga.
Segun kenni Erum, normal nga alegasyon ti rakurak ni Tamayo ken gagangay laeng a paglikudan ti subject a kukua na dagiti nakumpiskar a maipagarop a shabu.
Kuna ni Tamayo ket drug surenderee ken repeat offender gapo ta natiliw idi tawen 2014 ngem nakapyansa ken nagapela.
Malaksid iti daytoy, maibilang ni Tamayo kas Street Level Individual ken rumrumuar a konektado iti dadakkel a grupo nga agop-operar ditoy probinsya.
Inpalgak na a sipud rimuar iti pagbalodan ket nagtultuloy latta ti pannakamonitor kenni Tamayo ken adda dagiti report a maaw-awat da nga adda pay laeng ti iligal nga aktibidad na.
