LAOAG CITY – Balligi ti pannakaiyuswat ti search warrant operation iti Barangay 4 iti ili ti Bacarra babaen iti Provincial Drug Enforcement Unit (PDEU), PNP-Bacarra ken Provincial Intelligence Unit iti INPPO.

Nabigbig ti subject ti operasyon a ni Richard Pascua Ramiro, addaan ti umno nga edad, maysa a construction worker ken residente iti nasao a barangay.

Ti search warrant ket inparuk-at ni Judge Jacinto Merlin dela Cruz iti Regional Trial Court Branch 33 idiay Bauang, La Union.

Nakumpiskar dagiti otoridad ti lima a sachet ti maipagarop a shabu nga adda iti short pants a nakaipan iti sofa ti pagtaengan da Ramiro.

Sakbay ti operasyon, kwinestyunaran ni Barangay Kagawad Ferdinand Magcalas ken lolo ti subject ti operasyon no sadinno ken intudo-tudo na dagiti pulis ken kameng ti media.

Gapo iti daytoy, tiniliw dagiti otoridad ni Magcalas ken iti agdama ket adda iti kustudiyar ti PNP-Bacarra para iti pannakaipila ti kaso a sangwen na wenno Obstruction of Justice.

Naamoan a ni Magcalas ket isu met laeng ti agbalin kuma a witness iti drug buy bust operation idi napalabas a tawen ngem nagkedked daytoy rason a saan a natuloy ti operasyon.

Mainaig tii daytoy, kuna ni Barangay Kapitan Angelo Sales a ti subject ti operasyon a ni Ramiro ket drug surenderee ken saan nda a ninamnama a nagsubli iti iligal nga aramid na.

Inadmitir na a nakigtot idi naamoan na a ni Ramiro ti subject ti operasyon gapo ta awan met ti mammon-monitor da iti daytoy, ken awan dagiti nakairamramanan na iti barangay da kalpasan a simmuko.

Kabayatanna, inbatad ni Police Lt. Marlon Lorenzo, ti Deputy Chief of Police ti ili ti Bacarra a ni Ramiro ket karaman iti drug watchlist ken simmuko idi 2016.

Segun pay kenni Lorenzo, saan a mabalin ti inaramid ni Magcalas ken iti agdama ket maisagsaganan dagiti dokumento para iti pannakaipila ti kaso.

Inpetteng na a saan a rumbeng a malapdan ti operasyon nangruna ket inbilin daytoy ti korte ket isuda laeng ti mangimplementar.

Dinakamat na pay a saan a pudno dagiti alegasyon nga adda dagiti ummuna a simrek sakbay ti pormal a pannaiyuswat ti operasyon.