LAOAG CITY – Positibo ti naiyuswat a drug buy-bust operation iti Barangay Poblacion Uno iti ili ti Pasuquin a nakatiliwan ti maysa a pintor babaen kadagiti kameng ti Philippine Drug Enforcement Agency (PDEA).
Nabigbig ti subject ti operasyon a ni Jeorge Failano, agtawen ti 41, naasawaan, maysa a pintor, drug surenderee ken residente iti Barangay Poblacion 3 iti nasao met laeng nga ili.
Rumrumuar a naglako ti maysa a sachet ti maipagarop a shabu ni Failano.
Malaksid iti daytoy, nakumpiskar pay kenni failano ti uppat a sachet ti maatap met laeng a shabu, sangaribo a pisos ken siyam a pidaso ti sangaribo a pisos a boodle money.
Mainaig iti daytoy, inakusaran ni Failano a maipagarop nga inbulsa dagiti otoridad ti nakumpiskar kenkuana a maatap nga iligal a droga.
Segun kenni Failano, idi nalpas ti ar-aramiden na ket timmawag kenkuana ti gumatang ti motorsiklo na no sadinno inbaga ti maseknan nga adda isuna iti pagtaengan na rason a nagawid.
Kunana a sinabat isuna ti timmawag kenkuana ken kinallabay na isuna kageddan ti panangipapetpet na ti 10 a ribo a pisos ngem inbaga metten ti maseknan a saan nga agkutkuti.
Inlawlawag na a ditoy metten nga ado dagiti nagtaray nga immasideg kenkuana ken rinimpong da daytoy ken ditoy metten nga adda ti nairuwar iti bulsa na a double mint ken kaha ti sigarilyo rason a naggulagol ngem saan a nakagunay gapo ta maipagarop a pinayatan dagiti lallaki ti ulo na.
Ummuna iti daytoy, kunana nga umabot iti 16,500 a pisos ti napagtulagan a bayat ti motorsiklo ngem ti dadduma ket maited kuma idi kalman agingga a naitantan ita nga aldaw nga isu metten ti pannakatiliw na.
Mainaig iti daytoy, inbatad ni Failano a mabalin a ti agnagan ni Prudencio Tacata ti nangibaga nga adda ti iligal nga aramid na gapo iti sakit ti nakem gapo ta isuna ti nangireport iti pulisya iti kallabes.
