LAOAG CITY – Nagballigi ti naiyuswat a drug buy-bust operation iti Barangay Pila ditoy ciudad ti Laoag.
Nabigbig ti subject ti operasyon a ni Jomari Pascual, agtawen ti 46, naasawaan ken residente met laeng iti nadakamat a barangay.
Tiniliw a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu.
Iti pannakakapkap ni Pascual ket nakakumpiskar pay dagiti otoridad ti uppat a sachet a naglaon ti maipagarop a shabu ken ti sangaribo a pisos a nausar iti operasyon.
Kabayatanna, inpetteng ni Pascual nga inpabulsa na laeng ti naala a droga kenkuana.
Inadmitir na a nagus-usar iti ti illegal a droga ngem nabayagen nga insardeng na no sadinno a saanna payen a malagip no kaanu ti naudi a panagusar na gapu iti kinabayag nan.
Naamoan a ni Pascual ket karaman iti Regional Street Level no sadinno a saan laeng a ditoy probinsya ti pagop-operaran na no di ket iti pay sabali a probinsya.
Maisagsaganan ti pannakaipila ti reklamo a panaglabsing iti Republic Act (RA) 9165 wenno Comprehensive Dangerous Drugs Act of 2002 kontra kenni Pascual.
