LAOAG CITY – Nabati dagiti kameng ti New People’s Army ti lima a sako ti bagas ken dua a karton ti sardinas kalpasan ti engkwentroda ti Philippine Army iti kabanbantayan a paset ti Barangay Poblacion iti ili ti Nueva Era.
Nagpaot ti 15 a minuto ti rinnupak iti nagbaetan dagiti tropa ti gobierno ken rebelde a grupo.
Naammoan a nagturong ti makakannigid a grupo iti amianan a daya.
Mainaig iti daytoy, awan ti naipadamag a natay manipud iti tropa ti gobierno idinto a saan pay a masinunuo iti rebelde a grupo no adda ti pimmusay kadakuada.
Maipalagip nga inalay-ayan ni Gov. Matthew Marcos Manotoc ti panagamak ti publiko seknan iti napasamak nga engkwentro iti nagbaetan ti Philippine Army ken dagiti rebelde iti ili ti Nueva Era.
Inbatadna a basar iti impormasionna ket napan laeng gimmatang dagiti rebelde iti suplayda a taraon iti paset iti ili ti Nueva Era idi napasamak ti engkwentro iti nagbaetanda iti Philippine Army.
Immuna iti daytoy, inpasigurado pay ti Gobernador nga awan ti pangta ti seguridad ditoy probinsia manipud iti makakannigid a grupo a dagitoy ket mapapati a naggapu iti probinsia ti Abra.
