LAOAG CITY – Inakusaran ti pamilya Faelmoca iti Barangay 23 iti ili ti Sarrat dagiti sumagmamano a kameng ti Philippine National Police (PNP) iti nadakamat a lugar a nangdangran kadakuada.
Immuna a nainterview ditoy Bombo Radyo Laoag ni Mrs. Belinda Faelmoca ken ditoy nga inistorya na ti napasamak kalpasan a timmawag iti PNP-Sarrat tapno agpatulong gapu iti maipagarop a panagrirriri ti anak ken manugang na idi rabii ti biernes, Abril 9.
Nupay kasta, kuna ni Mrs. Faelmaco nga iti isasangpet dagiti sumagmamano a kameng ti pulisya ket nagderetso da lattan iti uneg ti balay da ken pinilit da a linukatan ti ridaw ti banyo nga ayan ti manugang na kalpasan na ket pinosasan da daytoy.
Inbaga na nga idi napusasan ti manugang na ket inpatugaw dagiti kameng ti pulisya kalpasan na ket linawlaw da ken nagtitinnulungan dan a kinabkabil.
Gapu iti daytoy, napan inar-arakop ti balasang na ti asawa na ngem maipagarop nga inramraman pay dagiti pulis a kinabkabil ti anak na.
Kinumpirmaran ni Mrs. Faelmaco a nabartek ti manugang na a ni Dexter Lucban iti dayta a gundaway ken nagriri da iti anak na a ni Jessa gapu iti problema iti pamilya kangrunaan na iti pinansyal.
Innayon na nga idi aganawa ket pinangtaan dagiti pulis nga iraman da a pilaan ti kaso gapu ta isuna ti nagtawtawag kadakuada.
Inpakaammo pay ni Mrs. Faelmaco a gapu iti nakaro a pannakadangran ti manugang na babaen kadagiti lima a pulis ket nagdardara pay ti ngiwat na.
Kuna na pay a saan a nakauniporme dagiti kameng ti pulisya iti panagturong da iti balay da ngem ti nagluganan da ket ti patrol ti PNP iti ili ti Sarrat.
Uray ti anak ni Mrs. Faelmaco a ni Jessa ket inbaga na a kinabkabil dagiti kameng ti pulisya ti asawa no sadinno a maipagarop nga inusar da pay ti paltog da a kalibre 45 ken M16 a pinangdangran da ken ni Dexter.
Inbatad ni Jessa nga idi mapan na isalakan ti asawa na ket pinungot-pungot ken kinugtaran dagiti pulis partikular ti binigbig na a Palpal ken Erik Rasalan.
Inpalgak pay ni Jessa a binekkel pay ni Rasalan.
Maluksaw pay ni Jessa gapu ta imbes nga isuda ti agi-blotter ket ti metten PNP no sadinno a kinasoan da pay ti asawa na iti disobedience ken direct assault.
Inadmitir ni Jessa a napungot ken nadanog na ti rupa ti maysa kadagiti pulis kalpasan a binekkel na daytoy ket saanen a makaanges idinto a ti maysa a pulis ket naperdi ti jacket na kalpasan a ginuyod na gapu iti maipagarop a panangipangpang-or na ti M16 iti buksit ti asawa na.
Immun-unan nga inbaga ni Jessa nga adda ti manarimaan a madengdengngeg a kaso ti asawa na a daytoy ket attempted murder.
Kabayatanna, awan ti kinapudno na ti alegasyon ti pamilya Faelmoca iti Barangay 23 iti ili ti Sarrat kontra kadagiti sumagmamano a kameng ti PNP iti nasao nga ili.
Daytoy ti inbatad ni Police Major Carlo Abing, ti chief of police iti ili ti Sarrat.
Inlawlawag iti Bombo Radyo Laoag ni Abing a timmawag ni Mrs. Belinda Faelmoca iti kwerpo ti pulisya idi rabii ti biernes tapno agpatulong gapu iti panangkabkabil ti manugang na iti anak na.
Inbaga na nga iti panagresponde dagiti kakadwa da iti balay da Faelmoca ket ditoy a nakita da a kabkabilen ti manugang na a ni Erik Rasalan ti anak na a ni Jessa.
Kuna pay ni Abing nga immuna a dinanog ni Rasalan ti maysa kadagiti nagresponde a pulis.
Iti agdama, nagtalinaed ni Rasalan iti kustodyar ti PNP ken napilaanen ti kaso a direct assault.
Inpakaammo pay ti chief of police a no kayat ti pamilya Faelmaco ti agpila ti reklamo mainaig iti alegasyon da iti PNP-Sarrat ket nawaya da ken nakasagana da met nga agsungbat.
