LAOAG CITY – Kinumpirmaran ni Barangay Kagawad Gilbert Miguel iti Barangay 2 ditoy ciudad ti Laoag a lima manipud kadagiti innem a nagpositibo iti virus idi kalman ket agkakabbalay idinto a ti maysa ket karruba da.
Segun kenni Miguel, ti nakapulapol dagiti maseknan nga agtrabtrabaho iti LCGH ken kabagyan met laeng dagiti lima.
Inbatad na pay a dagiti innem a nagpositibo ket isuda ti dimmalan iti swab testing idi Huwebes kalpasan a nagpositibo ni IN-C685.
Umabot met iti nasurok 20 nga indibidwal ti natrace da a nakapulapol dagiti nagpositibo ken manamnama a dumalan iti swab test.
Ummuna iti daytoy, kunana a karaman kadagiti natrace da ket dagiti nagatendar iti pasken wenno birthday ti maysa kadagiti nagpositibo.
Mainaig iti daytoy, kunana a nabagaan da metten dagiti karruba dagiti nagpositibo a saan da pay laeng a rumrumwar.
Kunana pay nga umabot iti 25 a pagtaengan wenno 35 a pamilya ti apektado iti pannakailockdown ti nasao a paset ti barangay.
Kabayatanna, kunana nga amin a kasapulan dagiti apektado iti lockdown ket isuda ngaopisyales ti mapan gumatang.
Innayon ni Miguel a nagkiddaw ti assistance ti barangay da iti PNP tapno tapno katulungan da nga agbantay.
