LAOAG CITY – Agepekto ita nga aldaw ti localized modified enhanced community quarantine iti ili ti Bangui.
Iti pammilin ni Gov. Matthew Marcos Manotoc babaen ti EO No. 129-21, manipud ita nga aldaw agpatingga intono Hunyo 26 ita a tawen ti implementasyon ti Localized MECQ iti nasao nga ili.
Gapu iti daytoy naiget a masurot dagiti health standards kas panagliklika ti panagturong iti Closed spaces, crowded places, ken close contact wenno 3C’s, agraman ti panagsuot ti facemask, face shield, social distance, ken awan ti agsisinnublat iti anyaman a banag.
Nalimitaran ti garaw dagiti residente para iti panagtrabaho, panaggatang kadagiti kasapulan babaen ti maysa a miembro ti pamilya, ken serbisyo, agraman dagiti aktibidad a maipalubos iti linaon ti nasao a pammilin.
Maiparit ti panagruwar dagiti agtawen ti 15 agpababa ken agtawen ti 65 agpangato, agraman dagiti addaan ti sakit, wenno comorbidity, masikog, malaksid no mapan gumatang ti kasapulan, ken agtrabaho kadagiti pasdek a maipalubos nga agoperar kasta met iti opisina.
Maipatungpal ti curfew iti alas-nuebe ti rabii agingga iti alas-kuatro ti parbangon, saan met nga apektado ti curfew dagiti Health workers ken hospital personnel, barangay official iti apektado a barangay, ken key officers ti munisipyo, kameng ti PNP ken BFP, ken APOR a kasapulan na ti agtrabaho kabayatan ti curfew.
Iti panagpasada ti trcicyel ket masapul a maysa laeng ti pasahero idinto a 50 a porsiento a kapasidad ti maipalubos iti Jeep.
Iti panagdalyasat iti nasao nga ili ket masapul nga imonitor dagiti otoridad dagiti rumwak ken sumrek iti national road kasta met nga agmonitor dagiti opisyal ti barangay kadagiti bukod nga entry ken exit points.
Maiparit ti panagidissaag ken panagilugan dagiti lumasat a behikulo iti nasao nga ili.
Kabayatanna, naipalon pay iti EO No. 129-21 seknan ti implementasyon ti MECQ ket agtultuloy ti operasyon dagiti ahensya ti gobyerno iti lokal ken national babaen ti skeleton workforce idinto dagiti dadduma nga agtrabaho ket maaddaan ti alternative work arrangement.
Kasapulan met ti panagtrabaho dagiti mangipapaay ti health ken emergency frontline service, iti laboratoryo, ken testing services.
Iti biang ti mass gathering, ket maiparit iti anyaman nga sporting event, ken dadduma pay nga entertainment activities, community assemblies, ken non-essential work gatherings.
Ti critical government services ken otorisado a humanitarian activities ket maipalubos ngem masurot ti minimum health standards.
Nalimitaran iti 10 a porsiento ti Religous Gatherings, malaksid no ingato ti mayor ti Bangui agingga iti 30 a porsiento a kapasidad.
Iti garaw dagiti APOR, masapul a mangala da iti kopya ti schedule no bilang agtrabtrabaho da iti sabali nga ili ken mangipaay da ti kopya iti munisipyo ken dagiti opisyal ti barangay.
Makastrek met dagiti APOR a saan a residente iti Bangui tapno agtrabaho wenno addaan ti transaksiyon ken mailista iti oras iti iseserrek na kasta met iti panagruwar ti maseknan.
Iti boundary control, masapul met a kitaen dagiti otoridad ti kondisyon dagiti APOR a saan a residente iti Bangui no bilang addaan da ti sintomas ti COVID-19 ket maiparit a makaserre ken maireport iti municipal health office. Kasta met kadagiti APOR nga agnanaed iti nasao nga ili.
Maipalubos ti panagehersisyo, kas panagbisikleta, panagjogging ken walking ngem masapul a masurot timinimum health standards.
Mapatawan met ti maiyannatop a pannusa dagiti aglabsing iti pagalagadan nga adda iti babaen ti umiso a linteg ken ordinansa.
